Жаңа тіл үйрену – Жаңа жылдағы ең танымал уәде. Және, бәлкім, ең орындалмайтыны да шығар. Қаншама адам курстарға жазылып, екі айдан кейін тастап кетті? Ал қаншама адам уақыттың жоқтығын сылтауратып, орталыққа немесе репетиторға да жете алмады?
Ең алдымен: шет тілі маған не үшін қажет деген сұраққа жауап беру керек. Жұмыс, ойын-сауық, саяхат немесе сүйікті фильмдерді түпнұсқада көру үшін бе. Бұл жауапқа оқу бағдарламасы мен оқуға қанша күш жұмсау керектігі тікелей байланысты. «Гарри Поттерді» түпнұсқада оқу немесе Нью-Йорк кафесінде тунец қосылған сэндвичке тапсырыс беру – екі түрлі мақсат. Біріншісіне жету үшін жылдар бойғы күнделікті сабақтар қажет болуы мүмкін, ал екіншісіне бірнеше сағат жеткілікті.
Ағылшын тілінде тез сөйлеп кеткісі келетіндер үшін біз үш айдан кейін оң нәтиже беретін алты әдісті таңдадық.
Онлайн оқыту
Біз мектептен академиялық білім беру стандарттарына үйреніп қалғанбыз: парталар, тақта, мұғалім. Көптеген адамдар жаңа білім алуды әлі де осылай қабылдайды және интернеттегі тіл курстарына дайын емес. Шын мәнінде, онлайн-оқытудың өзіндік артықшылықтары бар және қазіргі таңда оқытудың ондаған тиімді нұсқаларын ұсына отырып, қарқынды дамып келеді.
Оқуға өзіңізді ынталандыруға тура келетініне дайын болыңыз. Курстарда әдетте бұл іспен мұғалім айналысады. Онлайн-оқыту кезінде бәрі тек сізге және сіздің қалауыңызға байланысты. Есесіне сіз сабақ кестесін өзіңіз жасауға және қалаған кезде, қалаған жерде: түнде, іссапарда, кеңсеге бара жатқан жолда оқуға мүмкіндік аласыз.
Курсты таңдауға келсек – олар өте көп. Сертификатталған орталықтардың ақылы тренингтерінен бастап, кез келген дайындық деңгейіне арналған жүздеген сабақтары бар EngVid немесе BBC сияқты тегін платформаларға дейін.
Субтитрмен сериалдар көру
Ауызекі ағылшын тілінің деңгейін тез көтерудің қарапайым әрі қызықты тәсілі – түпнұсқа тіліндегі фильмдер мен сериалдарға көшу. «Тақтар ойынын» жақсы көресіз бе? Пайдалы мен жағымдыны ұштастырып, субтитрлерді қосыңыз.
Біріншіден, сіз сөйлесу кезіндегі артикуляция мен эмоцияны көзбен көресіз, дұрыс айтылуын естисіз. Екіншіден, жанды сөзбен кездесесіз, белгілі бір сөздер мен тіркестердің қайда, қандай жағдайда және қалай қолданылатынын көресіз. Интернетте орыс және ағылшын сөйлемдері бір уақытта көрсетілетін қос субтитрі бар сериалдарды да табуға болады.
Ағылшынша сөйлеу тәжірибесі
Тұрақты сөйлеу тәжірибесінсіз шет тілін сәтті үйрену мүмкін емес. Тілдік ортаға енбей, сіздің оқуыңыз тек теориялық сипатқа ие болады. Ағылшын тілін тек оқулықтар арқылы үйренудің мәңгілік проблемасы – бәрін түсінемін, бірақ ештеңе айта алмаймын. Алғашқы мүмкіндік туғанда жанды қарым-қатынас жасауға тырысыңыз.
Әлеуметтік желілерден сөйлесу клубын табу өте оңай. Сондай-ақ кітапханалар мен тіл орталықтарының жанындағы үйірмелер бар. Әдетте, олар тегін немесе шай мен печеньеге арналған ең аз ұйымдастырушылық жарнамен жұмыс істейді.
Қаласаңыз, өз клубыңызды құрып, аптасына бір рет кездесулер ұйымдастыра аласыз. Әрбір кездесуді басқа қатысушылар дайындалып үлгеруі үшін алдын ала жарияланатын бір тақырыпқа арнаңыз. Бұл фильм, кітап немесе кез келген басқа нәрсе болуы мүмкін. Тек бір ғана ереже бар: барлық әңгімелер тек ағылшын тілінде болуы керек.
Интернетте ана тілінде сөйлейтіндермен де тәжірибе жасауға болады. Coeffee сияқты сайттар пайдаланушыларға өз ана тілін үйреткені үшін олардың тілін үйренгісі келетіндерді табуға мүмкіндік береді. Қарым-қатынас Skype немесе өзіңізге ыңғайлы кез келген басқа мессенджер арқылы жүзеге асады.
Караоке
Ағылшын тілін үйренудің тағы бір ерекше тәсілі – караокеде ағылшын тілді орындаушылардың әндерін айту. Ән айту – сөзді есту арқылы қабылдауға көмектесетін сөйлеу тәжірибесінің тамаша нұсқасы. Естігенін ажырата және түсіне алмау – оқуға көп уақыт жұмсағандар үшін де басты проблемаға айналады.
Оның үстіне, есте сақтауға оңай лириканың арқасында көптеген ағылшын тіліндегі оралымдар мен идиомаларды үйрену жеңілірек болады. Етістіктерді шексіз жаттай бергенше, сүйікті әніңізді айтып жүру әлдеқайда көңілді екенімен келісерсіз.
Үздік 100 ағылшын фразасы
Үлкен оқулық пен жұқа тілашардың арасында таңдау жасағанда, тілашарды таңдаңыз. Барлық ережелер мен шақтарды бірден үйренуге тырыспаңыз. Сіздің бірінші міндетіңіз – өмірлік жағдайларда қолдана алатын тіркестерді меңгеру. Олардың құрылу логикасын түсініп, содан кейін ғана грамматика бойынша біліміңізді кеңейтіңіз.
100 негізгі фразадан тұратын тізім жасап, оларды автоматты түрде айтатындай етіп жаттап алыңыз. Жолды қалай сұрауға болады, көмек сұрау, кафеде тапсырыс беру, әуежайда билет сатып алу және т.б. Бұл ағылшын тілін түсінетін әлемнің кез келген нүктесінде өзіңізді сенімді сезіну үшін жеткілікті болады.
Күн сайын жаңа сөз
Ана тілінде сөйлейтіндер тұрақты қолданатын сөздердің саны небәрі 3000-ға жуық. Күніне 10 сөзден жаттай отырып, сіз бір жылдың ішінде орташа американдықтың немесе Лондон тұрғынының базалық сөздігін меңгересіз. Жаңа сөздерді өз сөзіңізге қосуды ұмытпаңыз.
Қағаз қиындыларына ағылшынша атауларды жазып, пәтердегі тиісті заттарға жапсырып қойыңыз. Оларға үнемі көзіңіз түскен сайын сіз ағылшын тілді ортаға тезірек еніп, үйреншікті заттардың шетелдік дыбысталуына дағдыланасыз.
Ағылшын тілі – халықаралық қатынас тілі және оны үйрену көптен бері хобби санатынан саяхаттауды ұнататын немесе кәсіби өсуде әрі қарай ілгерілегісі келетін әрбір адам үшін міндетті дағдыға айналған. Ағылшын тілі басқалардан бұрын жаңа ақпаратты білуге мүмкіндік бере отырып, бәсекелестік артықшылық береді. Тек АҚШ-тың өзінде жылына 10 000-нан астам ғылыми журналдар шығарылады.
Егер сіз ағылшын тілін әлі үйренбеген болсаңыз, онда дәл қазір бастайтын кез келді. Онлайн-курстар, түпнұсқа фильмдерге еркін қолжетімділік, караоке және басқа да көптеген тиімді әдістер сізді күтуде.
