Ән айтуды жақсы көрсеңіз де, көрмесеңіз де, ең жақын құрбыларыңызбен караоке-клубта болған шығарсыз және бұл міндетті түрде қайталанатынын білесіз. Өнеріңіз жоғары деңгейде болып, алған әсеріңіз ұмытылмас әрі позитивті болуы үшін біз сізге репертуар, дауыс қыздыру және сахналық бейне туралы бірнеше ережені дайындадық. Қыздар кешін толық дайындықпен қарсы алайық!
Нәзік шекара
Көңілді тәжірибе мен апаттың арасында нәзік шекара бар. Тіпті бәрі нашар болса да, үшінші коктейль анық артық болса да, дыбыс режиссері әннің ырғағын бұзып жіберсе де, ал микрофон кенеттен өте тайғақ затқа айналса да – харизма мен еркіндік бәрін құтқарып қалады. Басқаша ән айту ұят болатындай түрмен шырқаңыз, сеніңіз – бұл тамаша өнер көрсету болады.
Караоке туралы екі нәрсені есте сақтаңыз:
– Сіз көпшілік үшін емес, тек өзіңіз үшін ән айтасыз. Караоке – ән байқауы емес, сізді ешкім сөкпейтін және әрдайым қолдау көрсететін қызығушылықтар клубы.
– Сіз апаттың ауқымын сәл асыра бағалап тұрсыз. Бұны «фокус эффектісі» деп атайды, барлығы бізге қарап тұр деген ойдан есімізден тана жаздаймыз. Ешкім ештеңе көрген жоқ, келесі әнге тапсырыс беріңіз.
Шынайы болыңыз
Барлық отырғандарға ұнайтын әнді таңдауға деген құлшыныс өте күшті болады. Көпшілік таныс әуенді естіп, сізге қосылып ән айтып, би алаңына шыққаны керемет қой. Осыншалықты өзіңізге сенімді болмаңыз, кейде ең танымал композициялар жаңа бастаған вокалист үшін өте қиын болып шығады. Өзіңізге сұрақ қойып көріңізші, сіз шынымен рэп оқи аласыз ба? Шын мәнінде қолыңыздан келетін әнді орындауға тырысыңыз.
Орындалуы өте қарапайым және ерекше дағдыларды қажет етпейтін композициялар өте көп. Мысалы, Джоан Джеттің (Joan Jett) «I Love Rock ‘n’ Roll» әні залда міндетті түрде біраз дүмпу тудырады және оны ерекше вокалдық деректері жоқ адам да айта алады. Басты құпия – қайырмасын барынша қаттырақ айқайлап айту.
Дегенмен, ән сіздің дауыс тембріңізге сәйкес келуі керек. Егер сізде сопрано болса, төмен, бәсең контральтосы бар композицияларды айтуға үзілді-кесілді тыйым салынады. Бұл күлкілі көрінгендіктен ғана емес (өйткені ән орындаушымен және оның дауысымен тікелей байланыстырылады), бірінші кезекте көмейдің жарақаттануына әкелуі мүмкін болғандықтан. Сәтсіз алынған тым жоғары немесе тым төмен нота дауыс желбезектерінің немесе шырышты қабаттың зақымдалуына әкелуі мүмкін. Өкінішке орай, бұл шындық – барлық әндер сіз үшін бірдей пайдалы емес.
Терең дем алыңыз
Көпшілігі ұмытып кететін маңызды ереже – дайындық деңгейіне қарамастан дұрыс ән айту керек. Бұл ән айту кезінде микрофонды қалай ұстауға, қалай тыныс алуға, тіпті сахнада өзін қалай ұстауға да қатысты. Музыканың ырғағымен жамбасты аздап тербету – әрдайым әсерлі көрінеді, бірақ би қимылдарына тым беріліп кету тынысты бұзады, бұл орындау сапасына тікелей әсер етеді. Осы себепті эстрада әншілері би нөмірлері кезінде фонограммамен ән айтуды жөн көреді немесе сахналық белсенділік вокалға әсер етпеуі үшін әр қадамын ұзақ дайындайды.
Караоке-клубқа барар алдындағы дайындық та кем түспейтін маңызды рөл атқарады. Ол өте қарапайым және көмейдің шырышты қабатын зақымдамау үшін тым ыстық немесе суық сусындарды ішуден бас тартуды қамтиды. Бұл ретте тамақ ылғалды болып, құрғап кетпеуі үшін ішетін сұйықтық мөлшері жеткілікті болуы керек. Және тағы бір жағымсыз жайт: алкоголь – онша жақсы нұсқа емес. Тек батылдық үшін бір-екі шот ішуге ғана болады.
Ал караокенің ең басты ережесі: барлық ережелерді ұмытыңыз. Көңіл-күй – сізге қажет жалғыз кеңесші. Егер жаныңыз қаласа, қыздар кешінде ақымақтық жасаудан және күлкілі көрінуден қорықпаңыз. Көңілді кештің ешқандай сценарийі және вокал бойынша репетитордың ешқандай ұсынысы сіздің ішкі бұлқыныстарыңызды қарастырмайды. Ән айтыңыз және өзіңіз болыңыз.
Караокеңіз сәтті, қыздар кеші көңілді өтсін!
